سكابا يا دموع العين سكابا
دخيلك ليش في عندي كآبة
دموع العين مليانة حزينة
ولاد زغار عم تنده يا بابا
حواكير البيت عم تصرخ يا ويلي
كلاب العدو دنست الترابا
ناس عالطرقات راحت ضحايا
كرمال الارض عم تفنى الشبابا
منجيرة السلم كسرها العدو
قطع الأصال ووتار الربابة
قلوب الشعب تحولت بواريد
عدرب النصر بتشرع بوابا
الخيام شمسطار وبنت جبيل
وضِيَع عا مد عينك والنظر
ملحمة صمود حاملة الشهادة
ضد العدو … تا تحرر ترابا
رح نرجع عَ بيوتنا بلا مواعيد
نحضن الحيطان.. ونبوِّس ترابا
عدرب الدم والتضحية منرجع
ننشر سلام وحب… ومجد عبوابا
سكابا يا دموع العين سكابا
ما بدي موت تا تموت الديابا
وروحي تروح من أرضا فرحانة
ودم النصر عم يلمع عَ تيابا
محمّد إقبال حرب
مدونة بألوان المشاعر الانسانية 