لبنان مِش دولة
لا وزارة ولا دواير
لبنان مِش أرض منسيّة
لبنان حكاية اسمها وطن
من قبل ما تكّت ساعة الزمان
بيحكوها بسهرات الحُبّ والوفا
بأيام العواصف حنين ودفا
ساعة حُلم… ساعة كابوس
ساعة شَمعة عُمر ولعانة… لا بتخفّ ولا بتنوس
بتخلي الآلهة ترقُص مع الناس
مع الأرض… مع كلّ الأجناس
وعا غفلة بيدخل الشيطان
بينخُر قلوب خانها وسواس
بيدخل الشيطان… بيكبر الثُعبان
سكاكين بتدبح الشعب
العدو بينهَش الأرض
بدنِّس ترابا
بيرتفع النواح… بتسكت العتابا
ليش هالشقفة من الدني هالقد مرغوبة
وليش رحمِة السما عنها محجوبة
يمكن القلوب ما عادت تحبّ وتِعشق
وشجر الأرز… بالدمّ عم يغرق
البيوت صارت رماد… لا أهل لا ولاد
اللي صار أشلاء ارتاح من المذلّة
والباقيين عالطرقات… تايهين
خايفين ما يلاقوا أمان… كرامة ووطن كمان
هالبيت مدري لمين… تياب ولاد مشلّعين؟
لمين عواميد هالبيوت… بواب الدكاكين؟
شجرات محروقة وقصاري زرع مشلوحة
ووجوه تايهة عن أصلها مسلوخة
وين ضاعوا الناس وتهجّروا؟
ليش أرض الجنوب صارت يباب؟
والضاحية… سايبة للدياب
ليش ما في دولة استنكرت… يا ترى نحنا شو عملنا؟
بهالدني بلدنا ما الو صديق
كانوا يرقصوا معنا يوم الهنا
ليش تركونا وقت الضيق؟
دروب الهرَب… كلّها مسكّرة
ودروب الحرب… عالقبور مفتوحة
ما حدا بيسمع…أصوات مبحوحة
منُصرخ من عزّ الموت… نحنا صامدين
والغصّة إنو الصمود … لوحدنا باقيين
لا تندهي ما في حدا… مع إنو سامعين
أملنا تفرّخ الأرض رجال مغمورين
مثل زهر الأقحوان … مثل شقائق النعمان
روح بيضا… ودم قاني … حتى يفتخر حدا لما يقول “أنا لبناني
محمّد إقبال حرب
مدونة بألوان المشاعر الانسانية 