يا قمر

يا قمر يا بعيد، يا لقاعد خلف شجرتنا، صرلي ناطرك من عمر الحزن تا نقعد سوا مثل أيام زمان. ناطرك تا ابكي عكتافك وخلي دقات قلبي تتسارع بحضنك. لا، ما بدي عيد حكاية حبي القديمة، ولا بدي خبرك عن حبيبتي اللي ناطرتني هونيك بضيعتها تا روح اخطبها. ولأنو الزمن سرق أحلام حبنا بدي خبرك قديش أنا عتبان عليك. أي يا قمر عتبان عرفقتنا، أنا وياك لأنك ما خبرتني عن هالأيام السودا اللي عايشينها. لو خبرتني كنت هربت لبعيد وقبرت حالي بشي غربة وما كنت زرعت قلبي بصدر حبيبتي ولا كنت تحت السنديانة بستها.
صحيح يا قمر بحبك لما تجي بالليل وبحب سواد الليل اللي مخبيك. كنت تجبلي خبار حبيبتي اللي بهاك الحي ناطرتني. كنت تجبلي بوسة من شفافها كانت باعتتها مع هوا الأحلام. يا قمر بحبك لأنك بتعرف الأسرار والمواعيد وهيدا عتبي عليك. ليش ما خبرتني عن جلسات الزعما والمتآمرين عالبلد لما كانوا يتفقوا علينا وعا سرقتنا، تجويعنا ومذلتنا.

لا تتنهد يا قمر، ما في داعي للاعتذار لأنك شهم وحافظ الأسرار وما بتعرف تكذب وتمرق خبار. انت الوحيد الصادق بزمن الكذب، وفي بزمن الخداع.

خليك بعيد، ما تقرب، ما تحكي، بس خليني بين ديّاتك عم ابكي ونوح لأنو ما عاد في كتف ما هدّوا الهم والبكي، الكل غرقانين بدموعهن. أي يا قمر كل الناس بتبكي بالسر وبتشرب دموعها لأنوا ما عاد في مي بها البلد. ايه سرقوا المي والدواء وكرامة البشر باعوها بالسوق السوداء علف. في ناس بتصلي حتى تموت لأنو تعبت من المشي طول الليل بزواريب الوطن تفتش عكسرة خبز منسيي عند شي حجر مهجور تا تحفظ بقايا كرامتها.
لا، ما تطبطب عليي لأنو مش رح اسكت قبل ما يسكت قلبي ويترك جثتي تعفن عالطرقات  لأنو الموت صار بمصاري والمقابر صارت للذوات.

 بترجاك ما تفل حتى لو طلعت الشمس، خليني ابكي واشكي حتى ما أتذكر اني جوعان وطفران وزعلان كثير كثير لأنو الله خلقني انسان. تصور يا قمر لو الله خلقني بسينة بالحراش قديش كنت مبسوط وأنا عم اتصيد فيران، أو شي كلب عالطرقات عم يعوي ما كنت عرفت حقيقة الإنسان اللي بياكل أخو الإنسان.

بترجاك قبل ما تفل قبل ما تأخذ معك دمعة من دمعاتي وتحطها عا خد حبيبتي اللي ناطرتني هونيك يمكن تزهر دمعتي عاخدها شامية كل ما شافتها تتذكر قديش حبيتها بعصر الكراهية.

محمد إقبال حرب

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s