كل الناس كيكي… كيكي، راكضين يرقصوا كيكي. مش عارف ليش مبهورين كأنو اختراع جديد ومعتبرينو اكتشاف غربي. نحنا اللي اكتشفنا الكيكي بس ما كنا حاطين اسم ولا اخذين براءة اختراع من الجهة المنحطة المهتمة بهيك أمور.
ما كل البلد بترقص كيكي من زمان.
يعني كانت رقصات شعب بلا عنوان.
انا ومرتي منرقص كيكي لما يشتغل الاسانسير ونطلع عالطابق العاشر.
وانا وجاري منرقص كيكي لما تجي كهربة الدولة.
ومع جاري التاني منرقص كيكي لما ما تجي المي.
والبلد بترقص كيكي لما ينزل سعر البنزين.
بالضيعة منرقص كيكي للجور بالطرقات.
واحلى رقصة كيكي رقصة الشباب للأركيلة لحتى ينسوا انو ما في حياة.
بس الاحلى رقصة الحشيشة تا ننسى انو عايشين.
كنت رح انسى رقصة كيكي-يأس اللي ما عم بطلها من لما وعيت عالدني.
وشو رأيكن برقصة كيكي مع وطن هربان وشعب طفران. الشعب كلو بيرقص كيكي لمعاش الشهر أول يومين قبل ما ينقلع لحضن حكومة بتعمل كيكي عالشعب والشعب مفكرها كيكي فساد.
ارقصوا كيكي للزعما والنواب… ارقصوا كيكي وانتو بلا ثياب بلكي بيقرفوا منكم الزعما وبيروحوا عابلد الكيكي فيها طرقات اوسع وكيكي افظع بس خايف ما يلاقوا مثلنا ناس لا بتحس ولا بتسمع ولا بتقشع.
محمد إقبال حرب
مدونة بألوان المشاعر الانسانية 